قبض، پیٹ پھولنے اور گیس جیسے امراض

فائبر سے بھرپور غذائیں صحت مند اور طویل زندگی کے لیے نہایت اہم ہیں۔

سبزیاں، پھل، براؤن بریڈ، براؤن چاول، روٹی اور دلیہ فائبر کا بہترین ذریعہ ہیں، جو مختلف بیماریوں سے بچاؤ میں مددگار ثابت ہوتے ہیں۔ ماہرین کے مطابق، ہر ایک ہزار کیلوریز کی غذا میں کم از کم 14 گرام فائبر شامل ہونا چاہیے۔ اگر جسم میں فائبر کی کمی ہوجائے تو درج ذیل طبی مسائل سامنے آسکتے ہیں:

دائمی قبض

فائبر کی کمی قبض کا باعث بن سکتی ہے۔ ماہرین کے مطابق فائبر کی کچھ اقسام ہضم نہیں ہوتیں، جو نظامِ انہضام کو بہتر بناتی ہیں اور قبض کے خطرے کو کم کرتی ہیں۔

موٹاپا

فائبر سے بھرپور غذائیں، جیسے سبزیاں اور پھل، نوالے چبانے میں وقت لیتی ہیں اور پیٹ کو جلد بھرنے کا احساس دیتی ہیں۔ فائبر کی کمی سے لوگ زیادہ کھانے لگتے ہیں، جس سے وزن بڑھنے کا خطرہ ہوتا ہے۔

ہر وقت بھوک کا احساس

جنک اور فاسٹ فوڈز میں فائبر کی مقدار کم ہوتی ہے، جس کے باعث کھانے کے بعد بھی بھوک کا احساس برقرار رہتا ہے۔ فائبر پانی جذب کرکے پیٹ بھرنے کا احساس پیدا کرتا ہے، جو دیرپا تسکین فراہم کرتا ہے۔

بلڈ کولیسٹرول میں اضافہ

فائبر نہ صرف پیٹ بھرتا ہے بلکہ بلڈ کولیسٹرول کو کم کرنے میں بھی مددگار ہوتا ہے، جس سے دل اور خون کی شریانوں کی بیماریاں کم ہوتی ہیں۔

بلڈ شوگر کی زیادتی

فائبر سے بھرپور غذائیں بلڈ گلوکوز کے اخراج کو سست کرتی ہیں، جس سے بلڈ شوگر کی سطح متوازن رہتی ہے اور ذیابیطس ٹائپ 2 سے بچاؤ ممکن ہوتا ہے۔

آنتوں کے مسائل

فائبر کی کمی آنتوں اور معدے کی صحت پر منفی اثر ڈالتی ہے۔ اس سے بڑی آنت میں ورم اور دیگر مسائل پیدا ہوسکتے ہیں۔ صحت مند زندگی کے لیے اپنی روزمرہ کی غذا میں فائبر کا شامل ہونا نہایت ضروری ہے۔